حاجات وبتفرح :)

"قلب الحياة مليان حاجات وبتفرح"#

وبفرح .. 

لما ألاقي واحدة مش تعرفني شخصيًا ـ بس افتراضيًا ـ وتكلمني عشان تاخد رأي في حاجة خاصة

لما أعمل حاجة مجنونة جدًا ومش تعجب الناس بس بتكون عجباني أنا وأقول للناس في سري "جو تو زى هيل :p"

لما أدخل المطبخ ـ وده نادرًا ـ واخترع أكلة عجيبة .. رغم إنها ممكن تكون مش حلوة بس باكلها بنفس :)

لما أنام زعلانة وأبقى شايلة هم ازاي هقوم بكره، وإذ ببكره افتح عيني على مسج حلوة مكتوبة من القلب من حد بحبه، فابتسم وابدأ اليوم اللي كنت خايفة منه بانشكاح ^ـــــــ^

لما حد يكتبلي جواب ـ تؤ مش مسج ـ جواب لحم ودم وورق وحبر وخط حلو أو وحش كدهون

لما أقرا كتاب حلووو يخليني أفكر .. ويخطفني مني لأياااام .. ويسيب جوايا سحر خاص، طعمه حلو مش يتوصف بس يتحس 

لما اكتب بوست ويعجبني أو بمعنى تاني يقول كل اللي كان نفسي أقوله فارتاح وافرح

لما ألعب مع أطفال العيلة وأحس إنهم بيضحكوا من جوات جوات قلبهم

لما حبيبة تبصلي وعيونها فيها 100 علامة استفهام وترقب وتقولي "أنا حلوة ؟ " فارد: انتي قمر، واخدها في حضني فتضحك ضحكاية تخطف القلب :)

لما أسمع ماما وهي ساجدة بتدعيلي *ـــــــــــ* <3

لما ألاقي حد بيقول إنه دعالي دعواية حلوة من غير مااطلب ولا حتى أعرف

لما اروح آليكس واقعد قدام البحر واخلي الميه تلمس رجليا .. فـ احس بانتعاش وصفاء زهني رهيب

لما الناس اللي بحبهم يكونوا مبسوطين ومش زعلانين

لما ربنا يطبطب عليا بحلم حلو أو رسالة كونية

لما حد يكون عنده مشكلة ويفكر فيا كأول حد يلجأله، ثم ألاقيه بيقول انه ارتاح لمجرد الكلام معايا

ولما أكون سبب في ابتسامة حد

لما الدنيا تمطر والشجر يتغسل وانا ألعب تحت المطرة فلاقي روحي كمان اتغسلت

لما الشمس تطل بعد يوم مليان غيوم، فافتح الشباك ليها وابتسم واقولها نورتي

ولما اتصور صورة حلوة بتضحك أو أصور صورة تلقائية لناس مش واخدة بالها
لما أتحدى نفسي واعمل حاجة عمري ما تخيلت اني أقدر أعملها فاكتشفني من جديد

لما اكتشف أو أعلم نفسي حاجة جديدة بدون أي مساعدات خارجية

لما اشوف فيلم حلو من اللي بيخللي الواحد يعيط ثم يبتسم في النهاية

لما ........... أكيد في كتير بس ده اللي افتكرته :)

"مش كل شيء بيفوت في عمرنا بيجرح .. قلب الحياة مليان حاجات وبتفرح"#

ـــــــــــــــــــــــــ

#منيريات