"وتستمر الحياة ..."
جملة بتربكني .. مااعرفش المقصود منها إنها تطبطب علينا يعني ولا توجعنا؟ .. تفرحنا ولا تزعلنا؟
بس عارفة ..
أنا مش بحبها ـ رغم حقيقتها أو عشان حقيقتها ـ مش بعرف استوعبها، بكره وقتها الحياة بلا مبالاتها بينا .. كأننا ورق لشجرتها ولكل حد فينا خريفه اللي هيدبل ويقع فيه، عشان يجي ربيع ورق تاني، وهي مبتسمة دايمًا وواقفة ولا بيهمها مين وقع ولا مين جاي أخضر وفرحان وف الآخر هيقع ... معقولة نكون مجرد ورق شجر ؟!
الحياة بتستمر ياعزيزتي .. مفيش خلاف أكيد لكن هل احنا بنستمر ؟
لا أنا مش بتكلم عن "الوجود" .. أنا بتكلم عن "الحياة" .. فرق بين إننا نكون موجودين عشان بنتنفس، واننا موجودين عشان جوانا لسه "حي" .. الحكاية كلها إن كل ما حد يمشي .. كل ما ورقة تقع .. جزء فينا بيدبل ويقع ويموت فبنعيش بس نصنا دبلان
احنا بنستمر ياعزيزتي بس بقوة الدفع .. بنستمر عشان ورقنا لسه أخضر والخريف لسه ما جاش .
ـــــــــــــــــــــــــ
ردًا على بوست راء العزيزة Thinking آوت loud
هناك 8 تعليقات:
عزيزتي
هتكلم فى نقطتين :
الأولي : عن إن الإنسان مش بيموت دفعة واحدة , بيفضل تقع منه حاجات فى السكة ويتعب ويحاول يقف ويموت حلم ويحلم من جديد ويستمر كدا تقع منه حاجات وتضيع منه حاجات لحد ما ميتبقاش منه أي حاجة فييجي الموت فى النهاية ياخده وتنتهي حياته
(( وتقريبا دي حاجة قريتها فى كتاب لالياس خوري مش فاكر باب الشمس ولا اصلا مش فاكر كان إلياس خوري ولا حد تاني ))
والنقطة دي مهمة لسبب :)
لأن المهم إن الواحد يستمر يحلم ويعافر ويحارب وميبطلش ويتمسك بالحاجات اللى بيحبها ويعيش بجد مش يحاول يعيش , لاء نو إن أو إبسلوتلي , لازم يكافح ويحارب والمحاولة متنفعش لازم الواحد حتي لو عمل كدا وفشل يقوم من تاني , أنا مش هسمح للموت بإنه يخطفني فى النهاية من الحياة والدنيا توتني شوية بشوية وتخلص عمري وتنهي أحلامي , كل يوم حلم جديد وكل يوم حياة جديدة بتبتدي مع أول نور للشمس وحتي فى أحلك أوقات الظلمة بفتكر دايما إن الساعات الأكثر ظلمة هي التى تسبق الفجر , وبصبر , الفكرة كلها تحلم وتخطط وتتعب وتنفذ ولو فشلت عادي انته لسه فيك نفس والمستقبل لسه مجاش واللى رزقك مرة هيرزقك تاني , مهما كانت خسارتك فى الحياة سواء ناس قريبين منك او شغل او فلوس او حلم او حتي مبدأ , معني إنك بتنطق وتقول أنا خسرت وفى حاجات وقعت مني إنك لسه عايش وبالتالى فى إيدك تعيش بجد بإنك تحلم من جديد ( هوا أنا إبتديت أكرر كلامي ؟؟؟ مش عارف بس شكل الجلالة خدتني :) )
النقطة التانية : أيون الحياة بتستمر
الكون مش هيقف عشان وجع إنسان بسيط ولا هيتغير فى لحظة عشان خاطر واحد وقف يبكي وهتستمر الحياة ويستمر الوجود
أيون من حقك تقع وتعيط وتنهار وتبكي وتشقلب الدنيا علي بعضها وتدخل تكسر المطبخ بالكامل وتسهر بالليالى تعيط بس مش تدي أي حاجة أكتر من حقها , كل شىء فى الدنيا دي يستاهل ولكن السؤال المهم هوا يستاهل قد إيه ؟ هل يستحق كل العناء دا ؟؟؟
أيون كإنسان من حقك تتألم لأن دي طبيعة فيك ربنا إبتلاك بيها وهي إنك تحس وإنك مش مجرد ترس فى مكنة
بس فى نفس الوقت متبالغش فى الوجع ولا تنسي إن زي ما ليك نصيب من الوجع فى الحياة ليك نصيب من الفرح فيها وليك نصيب من السعادة والهنا وبالتالى كل ما تخلص شوية من رصيد الوجع إبتسم وقول أيون هانت أهيه هيفوت الوقت دا وهيعدي لأن القاعدة الأولي والأهم فى الكون دا هوا التغيير , مفيش شىء بيفضل علي حاله , كل حاجة بنعملها بتسيب أثر فى الوجود ومفيش حاجة بتحصل بدون سبب بالعكس كل حاجة بتحصل لسبب ما المهم نقدر نفتح عيوننا ومش نضحك علي نفسنا فى الأسباب ونقول أصل السبب كذا وهوا السبب تاني خالص , ونشيل العمي اللى بينزل علي عيوننا مش بيخلينا نشوف حاجات كتير لازم ناخد بالنا منها
الفكرة إن حتي لو خسرت وحتي لو إنتهي حلمك فكر فى اللى بتملكه دلوقتى إزاي تقدر تستعمله عشان يوصلك للحلم العالم البعيد ؟؟؟ فكر فى النقطة دي
علي فكرة أنا مفيش حاجة بكرهها أكتر من كلام التنمية البشرية بيشلني بصراحة والكلام دا مش تنمية بشرية :D
برا الموضوع بقى إمبارح كنت بشوف فيلم إسمه 21 grams
بيحكي فى إن اللى بينقص من الإنسان من وزنه بعد الموت واحد وعشرين جرام وياتري إيه دول ومعناهم إيه وفايدتهم إيه وياتري أصلا إيه تأثيرنا فى الحياة وإيه تأثير كل الجرامات دي
يا عزيزتي خلق الإنسان فى كبد متنسيش دا
إحنا بنستمر لأننا لسه عايشين لأننا حتي لو زعلنا وحبسنا نفسنا فى غرفة واحدة وقررنا نتألم فيها لحد الموت علي شىء ما فدا لا ينفي أبدا إننا هنخرج منها فى لحظة ما , طبيعة الإنسان مبيستحملش يقعد لوحده كتير ولا بيستحمل عزلة كتير فبيخرج وبيحاول يتمسك بوجعه كإنه إبنه اللى الحياة منحتهوله بعد إنتظار وشوية شوية إيد طفل الوجع بتفلت منك فى المولد وبتلاقى نفسك فى وسط هيصة عالية وضجيج وقلق وفرح وتفاصيل لا نهائية وأحداث كتير فتنسي إبنك وتدي الأمان تاني للحياة عشان تتوجع ولما تتوجع تاخد موقف وتتعلم وتفهم أكتر وتقرر الصح فين وتقول يارب سامحني وتصالح الناس اللى بتحبهم أو عالاقل تتمسك بيهم وفى الآخر تعيد الكره وكل مرة ترجع لربنا أو تفوق من اللى بتعمله أو تفهم إن الكام مليون طريقة اللى جربتهم فى الحياة مكانوش نافعين لأن ببساطة الحياة مش طبخة لطيفة ليها وصفة واحدة ولا مكنة ليها أسلوب واحد لتصليحها , كل واحد هوا اللى بيحدد وصفته وبيلاقى مليون طريقة فاشلة قبل ما يوصل للصح
طولت فى الكومنت
ختاماً : كل سنة وإنتي طيبة
ودا ردي عاللى فهمته من اللى كتبتيه :)
يارب أكون فاهم صح بقى :)
يلا
أشوفك علي خير فى بوست قادم لو كنت لسه متاح وموجود
شاب فقري
مش عارف اقول ايه
لكن ليس كل الاحياء احياء
و لا كل الاموات اموات
مش عارف هتفهميها ازاى بس هى جت كده
علاسة
شاب فقرى
الرحمة حلوة
هههههههههههههههههههههه
استمتعت بتعليقك
كل سنة و انت طيب
نفس الإحساس وأنا بكتبه برده :)
كنت مستمتع
التعليق الجاي عندك إن شاء الله عما قريب لو فضلت موجود :)
وأنت طيب :)
شاب فقرى
تشرف يا افندم
طب هو الواضح كدهون يعني إنكم احتليتوا المدونة :D
منورين جدًا على فكرة ^ـــــــــــ^
كريم :)
أنا مقتنعة جدًا بالفكرة الأولى، إننا مش بنموت دفعة واحدة، وإن كل شوية بتقع حاجات مننا وتموت، وإن الشاطر اللي في نهاية الرحلة يكون اللي عاش منه أكتر من اللي مات :)
أما النقطة التانية بقى واستمرار الحياة
اممممممممممم .. أنا مستوعبة إن ده اللي مفروض يحصل، إننا مش نقف عشان حد لأن لو وقفنا الكون مش هيتأثر ويمكن ده اللي بيضايقني في الموضوع كله، مش عارفة واصلك الاحساس ولا لاء، بس مثلاً يعني في مسلسل جريز أناتومي لما كل شوية كان حد يمشي ومش يكمل والحياة مستمرة عادي ، بستغرب هو احنا ازاي مش بنأثر في الحياة كده حتى لو سيبنا فيها ألف بصمة، بس برجع تاني أقول ما هو أصلاً إحنا مش بنعمل ده عشان الحياة لأنها كلها هتنهي، الشجرة نفسها هتتقلع من جذورها، فبالتالي الأثر مش لازم نحسه هنا .. ده اللي بيريحني لما أفكر كده :)
وكمان الآية اللي انت قولتها دي بتريحني جدًا "لقد خلقنا الإنسان في كبد"
منور دايمًا ياكريم وطول براحتك بقى هنتحرم من كومنتاتك بعد كده :(((
أستاذ إبراهيم :)
فاهماك جدًا ومقتنعة إن في ناس موجودة معانا بتكون ميتة، وناس ماتت وكل حاجة علمهولنا لسه موجودة معانا ومش ناسينها :)
نورتني بقى ^ـــــــــــ^
إرسال تعليق