عارفة ياراء المشكلة فين ؟
المشكلة إننا كنا ماشيين عادي وفجأة بقينا نمشي بعكاز رغم إن رجلينا لسه سليمة مش حصلها حاجة، المشكلة إننا كنا مستقلين جدًا وعاملين اكتفاء ذاتي لنفسنا، بس خلاص إحنا أدمنا العكاز .. ولما اتكسر لقينا رجلينا وقفت مش قادرة تتحملنا، فجأة وزننا تقل عليها ...
المشكلة ياعزيزتي إنهم قالولنا لازم نمشي ونكمل لأن ماينفعشي نقف طول ما رجلينا سليمة .. محدش قادر يفهم إن لما هو اتكسر إحنا مش بقينا زي الأول ...
إحنا بنمشي .. بس بعد ماننهك من المشي والجري (أحيانًا) بنكتشف إننا لسه هناك وقت العكاز ما اتكسر ... بنكتشف إننا كنا بندور حوالين نفسنا وإحنا فاكرين إن ده مشي .. وكأن الزمن وقف عند اللحظة دية ..
المشكلة في "النستولوجيا" اللي دايمًا تجيلك وانتي رايحة تنامي .. رغم إنك طول اليوم بتتهربي منها وبتحاولي على قد ما تقدري إنك تقولي " أنا تمام ... أو هكون تمام" ..
المشكلة في قبضة القلب اللي بتهجم عليكي .. وفجأة تلاقيكي بقيتي بتخافي من كل حاجة، فتشغلي قرآن بصوت العفاسي عشان يهديكي وتحضني المخدة وتنامي ... عشان تصحي الصبح تكرري نفس المأساة ونفس ذات الهروب ..
المشكلة إننا مش عارفين هنرجع تاني ازاي ؟ .. وهل هنعرف ؟!
..................
راء اللي بموت فيها :)
النهاردة كنت أنا اللي بتكلم بس بصوتك .. عارفة إحساس إن كأني بسمع نفسي فبرتاح لأنك قولتي كل اللي نفسي فيه .. كنت محتاجة لده جدًا النهاردة .. كنت محتاجة لحضنك أول مااتقابلنا .. وكنت محتاجة لوجودك جدًا ... واتأكدت من ده لما شوفتك .. مكنش لازم اليوم يخلص بدري كده .. كان نفسي أتبت فيه شوية .. وكالعادة حزومبل بيمارس مهمته الرسمية وبيرخم علينا ويفكرنا إن اليوم خلص .. بس عارفة الساعتين دول هيكفوني دفا لأيام كتيرة جاية :) .. هستنى مقابلتنا الجاية وإن شاء الله تكون قريبة .. بحبيكي أوي .. معاكي بكون "أنا" 3> 3>
هناك 12 تعليقًا:
ياني يامّه!! :)
حضن كبييييييييييييييييير اوي
انتي مش متخيلة انبساطي اني شوفتك ولا الهدايا اللي طايرة بيها.. كان نفسي تتكلمي وتحكي كل حاجة.. كان نفسي الوقت يتنيل على عينه ويقف مرة..كان نفسي وانا مروحة اقعد معاكي تاني ولو ف المترو الممل اللي مبعرفش اركز وانا راكباه.. :)
انا مش زعلانة يا دودو.. مش زعلانة من الدنيا النهارده بسببك
ملحوظة: أحدهم موجود في مكان ما وهيدينا المايّه اللي محتاجينها بدل العيش .. ديه معلومة أكيدة :)
وأنا منشكحة جدًا :)
"انا مش زعلانة يا دودو.. مش زعلانة من الدنيا النهارده بسببك"
وده كفاية بالنسبة لي يارودي :)
وأنا مصدقة ده جدًا :)
هو ايه انتوا مكفكوش القعدة مع بعض
محتليت صفحة التعليقات
ربنا يخلوكوا لبعض
هو صحيح النستولوجي تقرب لنستو يامعفنين ولا تشابع اسماء
تحياتى
:)
حلو حلو حلو
عجبنى اوى الكلام وارجو ايضاح النستولوجى علشان ابو زياد ....وعلشانى :D
ازيك يا دودو وحشاني اوي ،ومبسوطة انك انبسطتي ربنايسعدك دايما يا حبيبتي
هههههههههههههههههه
تصدق شبه الجبنه النستو :D
منور بقى :)
ريموووو
انتي اللي حلوة ووحشاني كتير :)
النستولوجيا هي الحنين الشديد للماضي :(
منوراني يانوري :)
زيزي :)
انتي اللي وحشاني يازيزي :)
ربنا يخليكي ياحبيبتي ^ــــــــ^
مش عارفة ليه كلامك ده خلاني أعيط رغم أنه يفرح, مش عارفة ليه في الوقت ده بالتحديد الكلام ده وجعني..
يمكن لأني مفتقداه..يمكن كنت مستنياه من أصحابي بس ملقتش غير ردود تألمني أكتر وأنا مفيش فيه مساحة للألم..يمكن لأني قررت أودع كل حاجة فاتت في حياتي ..ماعدا التدوين لأن هو حياتي!!
كل اللي عاوزه أقوله أحيكِ يادعاء إنك بتعبري عن فرحتك للناس اللي بتحبيهم متتخيليش ده بيفرق معهم أزاي؟!!
السكوت عن يوم حلو عشتيه بيخلي الطرف التاني ميحسش أنه فرق..لازم تتحسي اللي بتحبيهم دايما أنه مقابلتهم وكلامهم بيفرق!!
نيللي علي
نونا :)
بصي يانونا أنا بعتبر نفسي محظوظة في أصحابي، بحس إنهم رزق ونعمة من ربنا ... بس صدقيني في يوم من الأيام هتلاقي اللي يستاهل صداقتك بجد ويكون ليكي أكتر من الإخوات .. مش تزعلي لأن مش دايمًا لما بنحتاج حد بنلاقيه حتى لو كنا بنعتبره من أقرب الناس لينا :)
إرسال تعليق