أيوا عارفة إنك حاسة إني بكرهك ومش بحبيكي .. تؤؤؤ أبسولوتلي
عارفة لما تكوني جوا الصورة فمش شايفة كل تفاصيلها أو ممكن تكوني شايفاها بس بتنسيها .. وبعدين تبصي على الصورة ككل بعد ماتخلص فتلاحظي تفاصيل وحاجات مكنتيش شايفاها
أهو أنا دلوقتي بصالك من برة بعد ماخلصنا تصوير خلاص
فيكي اتعلمت اللي عمري مااتعلمته في السنين اللي فاتت من عمري .. واكتشفت في نفسي حاجات مكنتش أعرف إنها فيا
اتأكدت إن اللي بيحصلنا دايمًا وراه حكمة حتي لو مش شايفنها دلوقتي وحتى لو عقلنا مش مستوعبها وواثقة إني هفهم كل حكمك ورسايلك اللي مفهمتهاش لسه
اتعلمت إننا لما نحب حد نحبه وبسسسس ومانحاولش نفكر إحنا عنده إيه وقبل ده نحب نفسنا ومش نيجي عليها زيادة لأن بعد كده هنزعل إننا زعلناها
اتجسدتلي فيكي مقولة باولو لما قال " من نعم الله علينا أنه يغلق النوافذ أحيانًا"
وأنا راضية يارب بكل النوافذ اللي اتقفلت :)
فيكي فارقت ناس عمري مااتمنيت إني أفارقهم بس عارفة ساعات بنضطر نبعد عن ناس عشان عارفين إن قربنا منهم بيضرهم وبيوجعنا وبيوجعهم فبنضطر نودعهم ونسيب إيديهم وندعيلهم إن حياتهم تكون أحلى من غيرنا، وكل مانفتكرهم نفتكرهم بالخير وندعيلهم في سرنا إن ربنا يحفظهم ويسعدهم
من إنجازاتك: إن فيكي اشتغلت واستمريت في شغل لأكتر من 6 شهور وده إنجاز لواحدة عمرها مابتعمر في شغلانة أكتر من شهر :D
وحسيت فيكي لأول مرة إحساس الاعتماد على النفس والاستقلال ده مع أول مرتب أخدته :)
ومن ضغط الشغل اكتشفت إني صبورة .. آه والله تخيلي :D
واكتشفت إني عنيدة ومش بستسلم بسهولة حتى لو كل الظروف ضدي
والأهم فيكي إني عرفت معنى أعمق للإيمان بربنا .. علاقة فيها ارتياح إن ربنا دايمًا موجود عشان يطبطب علينا لما نحتاجله :)
آيون آيون ومن ضمن إنجازاتك كمان إن حبيبة عرفت تنطق دودو وبقت لما تيجي تنام معايا ماتبقاش عايزاني أنام وتقولي صحي النوم وكمان حفظتها أغاني كتيرة بقت كل ماتكلمني موبايل تغنيهالي :)
امممممم قصرت في حاجات كتيرة فيكي، وضاعت مني حاجات من ضمنها مدونتي وتقريبًا معظم كتاباتي اللي كتبتها طول السنين اللي فاتت، وبعدت عن الناس اللي بحس دايمًا معاهم بالدفا (أصدقاء التدوين) .. بس من هنا ومن مكاني هذا هرجع بإذن الله أجدد علاقتي بيهم لأن هما دول أكتر ناس بحس بدفاهم
عزيزتي 2012 .. كان فيكي أحداث كتيرة ومفاجآت أكتر .. بس عايزة أقولك كل حاجة حصلتلي فيكي أنا راضية بيها :)
ــــــــــــــــــــــــــــــــ
عزيزتي 2013 : خليكي عثولة معايا عشان في آخر يوم فيكي هفتكرلك كل حاجة عملتيها فقدمي السبت وعلى رأي المثل هي السنة إيه غير شوية ذكريات حلوة :D
ــــــــــــــــــــــــــــــــ
ع جنب : كل سنة وانتم طيبييين ويارب تحققوا كل اللي بتتمنوه والسنة دي تكون أسعد من اللي قبلها <3 <3
هناك 10 تعليقات:
التدوينه جميله
برغم انها بتلخص سنه فاتت
الا اني حسيت فيها
ان خبرتك في الحياة بقت اعمق
كل سنه وانتي طيبه وبخير ياغاليه :)
كل سنة وانت بكل الخير يا دعاء
ويارب السنة الجديدة تكون عليك سعيدة
دودو
حبيبتي
كل سنة وانتي اجمل ياارب
متنسيش ان 2012 احنا شوفنا بعض ودي من احلي الحاجات اللي حصلتلي
:)
يا رب اشوفك تاني وانتي اسعد واحدة ديماا
كل سنة وانتى طيبة
كل سنة وانتى سعيدة
كل سنة وانتى دعاء
عام سعيد عليكى
والسنة الجاية اشوفك لابسة الفستان ؟؟؟؟؟؟؟؟؟؟؟؟؟؟
تحياتى
عوداً حميداً يادعاء.. والسنة بحلوها ومرها بنتعلم حاجات لا اتعلمنها في مدارس ولا في أي حتة.. وربنا دايماً معكي ومعانا ويحقق ليكي كل حاجة بتتمنيها؛)
شمس النهار
كل سنة وانتي طيبة ياأحلى شموسة :)
ماهو إحنا مش بنخرج من السنين بحاجة غير الخبرات اللي بتضيفهالنا
منوراني جدًا ^ــــ^
تيمووو
وانت طيب وبخير يارب ويارب السنة الجاية ألاقيك لقيت فريدة قول آمييين :)
نهر الحب
ودية حاجة تتنسي أنا صحيح مش كتبتها بس بجد كانت من أحلى الحاجات اللي حصلتلي إني شوفتك
ربنا يفرح قلبك ياساسوو يااارب :)
إبراهيم رزق
كل سنة وانت دايمًا أخ كبير لينا كلنا
كل سنة وانت وساليناز وسولي وزياد ومامتهم بخيييير
أما بالنسبة للفستان بقى
فأنا عاجبني فستان وهشتريه عشان تبقى شوفتني بفستان آهون :D :D
نيللي
صح فعلاً مدرسة الحياة أكبر مدرسة بنتعلم منها
بس يارب نقدر نتعلم ومش ننسى اللي اتعلمناه :)
وكل سنة وانتي طيبة وبخير يارب :)
منوراني ^ــــ^
إرسال تعليق