الاثنين، 24 فبراير 2014

في طريق العودة إلي ..



عندما التحقت بالكلية كنت أعرف وجهتي جيدًا .. لم أتردد مثل كثيرين أي شعبة سأختار .. بالطبع" الصحافة".
وأثناء تعرفي على فنونها ... لم يروقني "ملكها" ... لم يروقني أبدًا  "الخبر" الذي يتسابق ويركض الجميع للحصول عليه ... أنا بطبيعتي لا أحب الركوض خلف الأشياء التي يركض حولها الجميع ... ولكن ليس هذا السبب الأساسي لعدم حبي للخبر .. بل لم يكن سببًا على الإطلاق ... الحقيقة والسبب الرئيسي أنني كنت أراه جامدًا لا روح فيه ... هو موضوع واحد يتناقله الجميع بلا أدنى إبداع وهذه من شروطه .. أن تكتبه كمن يقول النشرة بتعابير وجه محايدة  لا فرح .. لا حزن .. لا انفعال .. لا تجد روحك داخله... لذا .. وعلى عكس معظم المبتدأين .. اتجهت للتحقيق الصحفي .. "عشقي"
أتذكر جيدًا خطواتي الأولى .. أتذكر الأشخاص اللذين قابلتهم .. التحقيق يحكي قصة بلسان أشخاصها .. يتوغل في الإنسانيات .. يتوغل في تفاصيل الحكاية وملابساتها وأحداثها ..  يقول القصص بوجهة نظر صاحبها ...لا يحيل الشخص أبدًا إلى رقم .. أو الموت لسبق صحفي! .. ومع كل تحقيق صحفي .. كانت تضاف إلى حياتي حيوات أخرى .

 الغريب أنني عندما تركت التحقيقات وشغفها .. شيئًا ما توارى بداخلي .. شيئًا ما نقص .. روح أخرى لبستني .. جمود الخبر ورتابته .. هي ما فعلت بي هذا .. لذا أنا قررت أن أعود إلى شغفي .. قررت العودة إلي .. 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

هي فرحانة عشان عينيها بقت تنور زي زمان في الصور .. فرحانة عشان ضحكتها اللي رجعت على استحياء .. فرحانة إنها رجعت تاني تتصور وتحب الصور وتوثيق اللحظات .. لأن ده معناه إن روحها بترجعلها ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اكتشفت مؤخرًا إني مبعرفش أعمل حاجتين مع بعض .. مبعرفش أهتم بأكتر من حاجة في نفس الوقت .. بس الحياة مش كده .. الحياة باكيج على بعضها "take it or leave it" .. ومفيش حاجة هتستنانا لما نخلص اللي في ايدينا .. لأن لما نخلص هتكون هي مشت

الأحد، 16 فبراير 2014

دايمن وايلينا وساكن قصادي :D




دايمن وجع ايلينا.. وجعها رغم انه بيحبها ..السؤال بقى .. ليه بنوجع بعض وممكن نأذي بعض وأحيانا بتعمد ؟ أو بالأحرى ازاي ؟ .. ازاي بنقدر نخذل حد كنا ملاذه الآمن من الحياة ؟... ازاي بيجيلنا قلب نغرب حد كنا احنا وطنه ؟ .. ازاي بنعرف نكون مية نار لحد كان بيعتبرنا بلسمه ... وازاي ممكن أصلا يكون في علاقة طردية بين الحب والوجع ؟ .. أنا مش عارفة ايلينا هتسامح دايمن ولا لاء ... الأهم دايمن هيقدر يسامح نفسه ولا لاء !؟

 # "The vampire diaries"

------------



 الذنب مش ذنب اللي ساكن قصادك يانجاة .. الذنب ذنبك انتي لأنك دخلتي نفسك في وهم وسيبتيه يمتص روحك ... روحك اللي بدأت تنسحب منك واحدة واحدة لغاية مافوقتي على صوت فرحه .. لو هتلومي حد ..لومي نفسك .. لأنها الوحيدة المسؤولة عن مأساتك

أصل ماينفعش تكوني عارفة إن في عاصفة بره وتفتحيلها الباب وتسيبي البرد ينخور في كل عضمة من جسمك .. وف الآخر تلومي العاصفة
 ياعزيزتي ... اللي فتح الباب يقفله

 # تهييس بعد السرحان مع "ساكن قصادي"في المواصلات :D

 --------------------------------

 قالتلي : بس حرام عليه هو كده بيظلمها
 فقولت: لا .... هي اللي بتظلم نفسها لأنها سمحت له إنه يظلمها

الثلاثاء، 4 فبراير 2014

عن يوم المعطف :)



الكلمات بترسم وشوش البني آدمين  .. كل كلمة بترسم معاها وش وروح الكاتب اللي بتقراله .. الرائع بقى لما تلاقي اللي رسمته نفس الل لقيته والناس شبه أقلامها للدرجة دي .. عن النهاردة أتحدث :)

النهاردة يوم تاريخي ولا ينسى بكل المقاييس مش عشان حفل توقيع كتاب معطف من قيود بس .. لاء عشان شوفت ناس كان نفسي أشوفهم فيس تو فيس

شمس النهار: هي فعلاً شموسة بحضورها ودفاها واحتواءها وتشجيعها .. حسيتها فعلاً "شمس"

شيرين سامي: هي "فراشة" تلقائية وبسيطة وجميلة بحضورها زي كتابتها بالظبط :)

نور: فرحت جدًا لما شوفتها لأنها كانت محسساني اننا نشوف بعض ده من "المستحيلات" .. نور بقى هي نور بخفة دمها وحضورها اللي بيضفي بهجة على المكان :)

إبراهيم رزق: كالعادة بيجمع كل الناس حواليه ، بيقدر يهتم بالكل في نفس الوقت .. ده غير الأميرة ساليناز وزياد اللي مش واخد حقه في البيت ده :D

صابر عبدالقادر: إنسان محترم جدًا وأسرته جميلة ماقدرناش نتكلم كتير ، بس تتعوض ان شاء الله :)

محمد السيد: سعيدة جدًا اني اتعرفت عليه وبرضه ملحقناش نتكلم كتير واكيد تتعوض :)

رامي: بشوش جدًا ، تحس انك تعرفه من زمان رغم إن دي اول مرة بشوفه

أسامة الازهري: تحس انه ابن بلد و "جدع"

غادة محسن: بحبك اوي ياغادة وجودك بيبهجني :)

لبنى أحمد: فرحت اني شوفتك رغم اننا ماتفقناش على ده والصدفة دي كانت أحلى ما في اليوم :)

د/هيثم: إنسان مثقف جدًا وسعدت جدًا بالمناقشة معاه :)


أما اللي كنت اتمنى وجودهم معانا (دكتور مصطفى سيف/نسرين شرباتي/نيسان ) .. كانوا موجودين بكتاباتهم وروحهم، حتى لو الظروف منعت ده 

أما أصحابي بقى اللي هما أصلاً اخوات مش أصحاب:

سارة درويش/منى درويش/رضوى طارق/أماني صابر/أميرة صابر/بسمة حماد : مش محتاجة أقول أنا بحبكم قد ايه :) .. ربنا ما يحرمني من وجودكم أبدًا <3

الناس بقى اللي شوفتهم بالصدفة ومكنتش اعرف اني هقابلهم وفرحت اوي لما اتعرفت عليهم (رحاب صالح/وفاء شلبي/جوجو/أستاذ خالد زين/منى هيكل)

بجد شكرًا على اليوم ده ^ـــــــــــــــــ^

ـــــــــــــــــــــــــــــــــــــــــــــ

رغم الإرهاق والسفر والتعب كان لازم أسجل هنا اليوم ده :)

السبت، 1 فبراير 2014

قيود المعطف والفراشة :)



عن معطف من القيود ..

عن المعطف اللي بدأ تدوينة ثم فكرة جماعية ثم كتاب :)

عن المعطف اللي من قيود وبيحررنا في نفس ذات الوقت من القيود دي :)

عن الناس الأكتر من رائعة المشاركة فيه  ^ــــــــــــ^

عن الكتاب اللي طلع عنيننا .. وكنا كل ما نيجي نقول خلاص نلاقي مشكلة في النص :D

عن إننا قدرنا نتغلب على كل المشاكل دي .. وطلعنالها لساننا :P

عن إننا هنتجمع أخيرًا وفـ ايدينا "المعطف" 

عن إنكم لازم تيجوا يوم التلات /4 فبراير/الساعة 2 .. عشان ده مش كتابنا لوحدنا :)

عن إن فرحة الكتاب هتكملها فرحتنا بـقيد الفراشة وبشيرين وروايتها الرائعة <3

عن إن اليوم من الآخر كدهون مايتعوضش :D

فدوسوا هنا على الايفنت بقى عشان محدش يكون له حجة .. مستنينكم :)